贏在敦倫前，輸在成長後 - 方卓如

2016年6月22日 - 信報

留歐嘅賠率低過脫歐，表示外界覺得留歐大熱， 脫歐嘅機會較低。但唔好唔記得，個多星期前，騎士攞NBA總冠軍嘅賠率，只係數字上高過零，結果係無論幾冷嘅賠率都可以爆，機會幾低嘅事情都可以發生。

我曾講過，今年係夢想成真嘅一年，愈魔幻愈無可能嘅事情，一件一件喺你面前發生。而家係最有錢嗰班走晒出嚟勸人唔好脫歐，深深感覺被移民影響生活嘅英國人看在眼內，你估佢哋想留歐定脫歐？

人生根本無起跑線

如果脫歐危害咁大，仲會禍延下一代，點解會容許公投發生？如果禍害咁大都有人贊成，表示投票嘅人一係唔識嘢，一係唔理性，咁仲畀佢哋公投？呢啲案例好容易給當權者用嚟打壓異見，證明有時民主到讓你就重大事項公投，不表示大眾有能力投向正確一面，又或者根本冇正確可言，只要國民肯承受結果，投向不正確又如何？況且而家正確唔正確，都係錢行頭。

而家呢個世界，好多嘢錢買唔到，買到嘅嘢又唔需要好多錢。只要人類唔受錢限制，行為就冇得估。

用Resale Value計，而家買樓即變負資產。再加上現代父母要求子女贏在敦倫前，資助子女買樓成為父母本份。不過，新一代價值觀不在於錢，老一代份工朝不保夕，全靠用畢生投資積蓄去支持自己一層子女一層共兩層樓。就算英國唔脫歐，升咗咁耐嘅資產價值總有一日爆煲，老一代係冇防守能力，新一代更加唔會有搵錢進攻能力。

贏在敦倫前，輸在成長後，父母最後會發覺，原來一生千算萬算，務求令子女脫穎而出，結果發覺原來人生並唔係一場直線嘅跑步比賽，而係一場打到自己超水準，乜嘢位置都可以發揮，仲可以後來居上嘅籃球比賽，根本冇一條起跑線。