2016年5月17日星期二

全世界都係L形經濟 - 方卓如

2016年5月11日 - 信報

無論經濟係L形、V形、U形,都要返大陸搵着數, 信佢一成都死。話時話,全世界都變咗L形經濟,一旦落咗底,就要打橫行好耐。橫行未必係壞事,日本都橫行咗好耐,日本嘅企業冇晒競爭力,但係日本人依然繼續生存,多咗古着店,多咗放題,汽水機仲係百二円。經濟橫行,生活樸素啲,冇咁多物質要求,唔一定慘過V形U形反彈。2003年到而家持續反彈,你覺得你嘅生活水平有同步上升咩?係咪覺得錢搵多咗但係唔見使?銀紙只係資源換領券,多咗換領券唔一定代表你可以換多咗資源。

七十年代唔同九十年代

七十年代出生嘅人,佢哋思想好單純,只係不停讀書返工搵錢提升生活水平。佢哋見證住由冇到有嘅過程,不但佢哋自己係由冇到有,連社會都係由冇到有。基本上,而家嘅生活必需品,佢哋係親眼目睹佢哋嘅誕生。呢代人如果叻嘅,已經享受過所有物質帶嚟嘅樂趣,應該進化到唔再追求物質。七十年代出生嘅活到而家,唔再追求物質,目前可以話生活得相當自在。

只係佢哋嘅死穴,係有個生於九十或千禧年代嘅細路。呢班下一代,經歷由有到冇,同佢哋老竇老母剛剛相反。佢哋細個嘅時候,啱啱開始讀書懂事嘅時候,就係沙士同七一遊行。老竇老母仲係負資產,老竇可能失業一輪之後搵番份工。九十年代嘅細路仔,成長過程目睹家庭遭遇逆境,佢哋已經唔信嗰套默默耕耘修成正果,佢哋知道世界係好脆弱,兩三下打擊就可以改變你生活。七十年代嘅小朋友,生命係坐火箭直線升空,靠本事定奪去到幾高幾遠。九十年代嘅小朋友,親見生命係反反覆覆,同股票一樣可升可跌。生於物質泛濫嘅年代,今時今日嘅年輕人更加唔係搵食至上。結果係,本來可以舒舒服服嘅七十年代中坑,畀佢哋屋企嘅九十年代年輕人煩死。唯一可以做嘅係,選擇放手畀佢哋自己闖,又或者辛苦多廿年,為你屋企嗰兩件二次創業,做埋佢哋嗰份。

沒有留言:

發佈留言