樂觀嘅人先有發達 - 方卓如

2016年2月5日 - 信報

過咗立春，正式係猴年。上年隻木羊原來真係木宰羊，唔知佢會搞到大市chok上chok落，將大部分散戶變晒綿羊。今年係火猴，馬騮着晒火會唔會跳到飛天？鬼佬嘅新年股市就跌到一仆一碌，中國人嘅新年有冇起色？

上一次猴年係2004年，百廢待興，樓價谷底反彈，自由行開始泵水嚟香港。可以話，上一隻馬騮帶挈香港人開始發達。今回呢隻馬騮是否同上次一樣喺谷底出山？今年冇人睇好，個個都淡到暈，不過唔好忘記，12年前沙士之後，個個都係嗌晒救命，人人都仲係愁眉苦臉。

2003年令香港人信心跌到零，2004年都未敢大舉出擊。而家睇番轉頭，個個都呻笨，心諗如果有下一次沙士級嘅谷底，2008年式嘅跌市，一定衝入去狂撈底。你又知而家唔係底？印咗7年銀紙，家陣好多人都有錢，購買力十足，只係等待終極一跌，衰到貼地，就會空群而出。

猴年只要大冧，又或者唔冧，令有錢人覺得原來到底，銀紙自然重回市場。所以呢隻火猴，識唔識偷桃就唔知，但係點睇都係會偷到啲銀紙返出嚟入市。

悲觀嘅人係唔會發達。過去50年，所有可以發達嘅人，都係喺所有人極度悲觀嘅時候做啲樂觀嘅嘢，然後佢嘅樂觀得到回報。萬一今次悲觀原來係啱嘅，樂觀係錯呢？反正如果悲觀先係正確，世界大亂，大家攬炒，都唔使再分貧賤富貴，又有什麼分別？謹慎係好事，凡事唔好去得太盡，留有一手，係做人嘅常識。但係如果要發達，唔係日日為儲錢買樓煩惱，你要學習唔好畀情緒控制你，明白世界就係起起跌跌。二戰之後70年係人類最長最happy嘅繁榮期，你而家嘆到嘅生活係歷史上從未有人嘆過。我地只係不斷延長呢段嘆世界期，終有一日冇得嘆嘅話，要捱，都只不過係人類生活一部分。

大環境你冇辦法控制，惟有喺大環境之下做到最好。樂觀啲，猴年你有運行。