2015年11月19日星期四

上落市先關你事 - 方卓如

2015年11月19日 - 信報

港股回復上落市嘅情況。本欄一直為大家指出你長期被人洗腦嘅概念,上落市等於投資冇運行是另一例子。

大家一聽到上落市難免眉頭一皺,覺得搵唔到食、冇貨買,賺唔到錢。呢個概念毒害咗你半世人,搞到你輸錢。點解?大市只係得三種情況,一係上落市,再唔係就升市同冧市。以前社會由無到有,經濟起飛,可以有個長期穩定嘅升勢。而家全世界經濟都半死不活,靠銀紙支撐,除非一次推冧然後百廢待興,否則唔會再有細水長流嘅漫長升勢。升市冧市其實都係輸錢陷阱,升市令你瘋狂加注,唔肯止蝕,往往輸凸;冧市更加唔使講,生靈塗炭,血流成河,個個都要輸。

上落市反而你仲可以贏。上落市,即係有股票上、有股票落。上落市,大家唔係貿然落注,好似喺葡京入面,你總見到有啲人揸住疊籌碼,印吓印吓,行嚟行去,呢張枱落啲,嗰張枱又落啲。購買力仍然存在,只係非常揀擇。你唔會瞓身,贏少少會走,上落市通常你會有得執,呢啲時候先係散戶最易贏錢,好少輸入肉嘅場面。

購買力尚存 少贏即閃

升市冧市反而係強者嘅世界。升市賺得最勁嘅,一定係大戶。佢哋貨多,平日唔係賣得幾多,啄吓啄吓,皮費都唔夠。升市嘅時候,豬乸都識飛天,豬扒都有人搶,大戶日日好似印銀紙一樣,幾鬼開心。冧市賺得最勁嘅,係技術最高,架生最齊嘅。佢哋有本事愈沽愈贏,冇貨照沽,沽咗都睇唔出。你唔係強者,升市同冧市你其實冇着數。

上落市會維持好耐,你唔好為咗呢三個字,就冇晒心機,覺得冇機會。呢個時候一樣有大把人做緊嘢,冇停過。

記住,好多人靠股市開飯,冇可能畀個市停。唔上唔落,即係有上有落,咁你先有機會又買又賣。至於買乜嘢賣乜嘢,唔係本欄嘅強項。

沒有留言:

發佈留言