2015年4月22日星期三

最緊要等得 - 方卓如

2015年4月15日 - 信報

乜嘢叫全民皆股,你應該感受到。而家搭(車立)、飲茶、食早餐,全世界人都在講冧巴,如果你唔講股票就會俾人當你喺外星返嚟。傳統智慧喺啲咁嘅全民皆股嘅時候,就係見頂爆煲之時。但係今次唔同,今次係有外來勢力加入,衝緊入嚟嗰批唔係魚,係鯊魚。鯊魚唔會係最後一批俾人宰割嘅婦孺,換言之今次向前衝未完,仲要等最後的小綿羊入閘。

真正價值投資贏到開巷

人哋話價值投資今次用唔着,但我話真正識得價值投資嘅今次先會贏大錢。上年「滬港通」剛開始,好出名嘅銀行界老行尊已經同我講,港交所(00388)要睇二百四。

結果梗係佢講嘅二百四,「滬港通」開通咗差不多成4個月都冇嘢睇,如果唔係突然間開咗條水喉,谷到2000億成交,老行尊都仲係俾人笑緊。但你咪理,價值投資計到應該值二百四,佢就會喺百七百八蚊密密咁買,仲會好耐心咁等,期間唔理你點笑,俾人話佢就搬價值投資呢套嚟擋。結果?佢咪贏到開巷,雖然佢贏嘅原因同佢原本諗嘅未必一樣。

價值投資就係有呢種預先肯買同肯等嘅耐性,我發覺呢招真係今時今日必勝嘅方法,就係坐。坐呢一招,喺香港最work。點解?因為香港有賣殼呢家嘢。試諗吓,你買錯咗垃圾股,一路跌,正路嘅思維係,賣咗佢啦,公司可能永遠都賺唔到錢,只有愈蝕愈多,到頭來渣都冇。

但喺香港,你蝕錢?正,仲唔係殼股,隨時有間巨無霸入場,股東賺嘅可能仲多過公司正正經經做生意。就係咁,蝕錢嘅公司股價可能仲升,你今日買咗嘅垃圾股,明日就可能變成熱炒股。

實例證明,呢幾日證券行最忙嘅,就係幫客戶將啲本來蝕到喊、成張股票收埋咗喺床下底嘅,而家存番入倉準備沽。要最後勝利,你就要等得。

沒有留言:

發佈留言