2015年3月24日星期二

點叻都要講運 - 方卓如

2015年3月19日 - 信報

帛琉政府要減一半中國航班,講明是寧願少吃餐,都要保護大自然環境,同埋當地人生活。換轉喺香港,就會畀人話「未富先驕」,阻礙經濟發展,對旅客唔得包容。帛琉窮過香港咁多,都寧願賺少啲,保護生態環境同生活習慣,證明經濟發展唔一定係硬道理,乜嘢叫生活質素先至係重點。

而家唔係咁多人講畢非德一年一度寫畀股東嗰封信,亦都唔係咁多人有時間睇晒38頁。想快,睇佢第一頁,同佢拍檔另外寫的幾頁紙,夠晒。

股神講市價道理

佢第一頁講乜?好簡單,佢有咁多投資項目,賬面值已經唔可以反映佢間旗艦嘅內在價值,早期還可以,而家要睇市價。佢呢句說話,喺香港人眼中,直情係一個簡潔易明嘅概念。如果靠賬面值去衡量股票公司,去諗買定唔買,死梗。

香港大把升到你唔信嘅公司,賬面值完全落後,亦有大量公司股價追唔上賬面值。賺錢愈嚟愈多嘅公司,P/E可以愈來愈低,股票愈買愈輸。冇錢賺嘅公司,甚至負資產嘅公司,股價又唔會跌到零,仲可能節節上升。畢非德咁有心思,向股東煞有介事解釋的道理,喺香港根本就係常識,街頭智慧,習以為常。

以前得,賬面值真係可以同公司價值掛鈎,係因為以前公司真係用嚟做生意,資產負債貨真價實。你有咁多資產,就可以賺幾多錢,而賺錢多少,大部分與你現金收入差唔多,好少mark to market,乜都冇做,突然就話你賺咗幾億。而家世界喜歡複雜計算,自然公司價值幾多都變成複雜概念。冇人會再用公司賬面值去睇股票,賬面值同公司價值可以永遠唔converge。

畢非德拍檔又寫啲乜?佢話畢非德成功之道,同萬一畢非德走咗,公司會變成點。成功之道有四點,有一點係最中肯:好運。

沒有留言:

發佈留言