2015年2月24日星期二

用錢愈少愈有福 - 方卓如

2015年2月23日 - 信報

新年唔止係講意頭,仲講願景,所以先有咁多運程預告,又咁多新年願望。你年初一收到咁多WhatsApp賀年說話,加加埋埋,就係羊年集體意願。

你今年聽少咗祝你賺多啲嘅說話,因為而家好多人都覺得,賺多咗唔一定等於生活好咗。你睇歐洲,佢哋賺錢冇你咁多,隨時少過任何一個喺中環返工嘅中產。

歐洲少少錢享受高質生活

但佢哋飲杯咖啡一蚊歐羅,你要三十蚊港紙。食到你飽,五蚊歐羅有找,仲要保證你食落肚嘅係堅嘢。佢哋啲城市都俾遊客攻陷,都有俾大陸人搶購掃貨,但俾人掃貨之後,佢哋有錢落袋,唔係俾地產商繳晒械。你喺香港可以搵到成手銀紙,但換唔到一個安樂嘅生活,你手上啲錢都只係一堆紙而已。

當大家知道愈搵愈多,生活反而愈來愈艱苦,過年都唔祝你搵多啲,費事害你。有錢嗰班,食又食過,玩又玩過,平時出嚟聚埋一齊,講啲乜嘢?講做運動。唔使錢嘅就去跑吓步,要錢嘅講去打波舉鐵,再要費周章嘅,搞去潛水滑雪,運動強身健體先係最潮共同語言。

而家邊度啲嘢最平?講你都唔信,歐洲最平。你見過一百円店,見過十蚊店,你去睇吓一歐羅大平賣,衫褲鞋襪一歐羅任揀。佢賺盡都係一歐羅,咁個本幾錢?平到你唔信,賤物鬥窮人。窮呢個字要認清楚,如果窮係冇錢,唔代表生活質素差,好多時候優質生活唔使點用錢,錢可以用得愈少你愈幸福。成手銀紙但生不如死,咁就真係窮得只剩下錢。

賣一歐羅都有錢賺,啲貨好似唔使錢嘅,用呢招最醒嘅當然係香港人。乜嘢係唔使本但又可以賣得好價錢?梗係股票啦,紙嚟㗎咋,賣到成行成市。新一年,祝大家生活質素提升,錢可以愈用愈少。

沒有留言:

發佈留言