香港人係汽車修理員 - 方卓如

2014年11月18日 - 信報

「滬港通」，買A股熱情比買港股高近十倍！香港成日要阿爺益你，而家係時候要你十倍奉還。

唔可以淨係用幾多錢入市買股票嚟斷定「滬港通」對香港有冇着數，香港人短視得只望到鼻尖的事情，任何事情判決只懂得跟股市掛鈎，所以大學教授都只曉得用指數升跌計算佔領運動經濟損失，大概佢而家要走出嚟話佔領運動令香港賺錢。投資者買A股都要經過香港券商，而香港上市公司而家又多咗批潛在投資者，單係用額度使用率判斷香港點樣唔着數，會流於三日貨仔，到第四日大家就會對買港股額度多少變得麻木，覺得理所當然，又一次將底線降低。

李小加在開通儀式上，說「滬港通」秘密商議15個月後終於成事。15個月？15個月前即是上年8月，啱啱喺6月見底時反彈，上年8月市況唔差。

污水爭住要　清水無人吼

香港人慣咗喺奄奄一息嘅時候先至問阿爺攞嘢，例如沙士。風平浪靜好少問攞嘢，仲係問一件唔會有人夠膽開口嘅國策攸關要求，明顯唔係香港呢邊擺上枱出嚟研究。

「滬港通」最核心嘅任務，係唔係益香港，唔使多講喇啩？

內地股市係污水，香港股市係清水？但係而家就有百幾億走上去趟污水，清水反而冇人吼。如果污水可以賺錢，清水就真係令人只可以飲清水，你會點揀？污水有機會湧入整污糟盤清水，乜你又以為污水只有股市咩？

其他污水未有湧入整污糟你咩？一件污，兩件穢，香港人一早好似汽車修理技工咁，成身冇撻乾淨，多少少污水，搵食啫，唔通你介意？