香港梗係冇事 - 方卓如

2014年10月23日 - 信報

政治問題，政治解決，但問題是，香港人最唔懂得用政治解決政治問題。香港人乜都玩過，但就係未玩過政治。殖民地時代，邊度會畀你玩，打份政府工就有你份。一國兩制年代，政治係刀刀見骨嗰隻，香港人更加玩唔起。學生話政治問題政治解決，但係仲用提交報告修改法律方法搞政治，捉錯晒用神。咁搞法，就算學生走晒去自首踎監，都解決唔到政治問題。

政治係講詭計

佢哋如果生喺西方國家，就係政治人才啦。越級同啲政治老鬼辯論，面無懼色，不卑不亢，大部分所謂議員都冇咁嘅水平。佢哋喺電視機面前做到咁嘅表現，換着喺西方國家，有扭轉投票意向嘅威力。可惜，中國嘅政治，唔係講辯論，唔係講法律，係講詭計，講拳頭。學生唇紅齒白，眉清目秀，不屑爾虞我詐，唔會出手打人。但係佢哋嘅真正對手，唔係面前一部錄音機加個花樽同垃圾桶，而係背後由細打交打大的高手。

佢哋每天想着點防人，點整人。要見血的話，眼都唔眨。佢哋見到而家人山人海的場面，已經捲起衫袖等你過嚟，但見你行到埋嚟，講了兩個鐘，原來唔係開拖，係要寫報告，改法律，佢笑一笑，心諗你唔係講真吖嘛，佢都唔知打你好定唔打你好。學生要嘅嘢唔單只攞唔到，更加會惹對方就打你一鑊，反正覺得你原來唔對嘴。

政治問題本來係社會唔公義，學生今次揭起晒政府嘅醜惡，已經贏咗。政府冇得作惡，亦開創咗一條對付政府惡行嘅方法，以前好多議員講到牙血都出埋都冇咁嘅效果。呢班學生應該出嚟做議員，等市民有得揀，等市民覺得仲有希望。

香港人好大鑊

如果25日內發生嘅事情濃縮到5日來全部完成，沒有反對勢力醞釀出來，快閃完成佔領運動，嗰種深不見底嘅民眾力量，可以抽水抽足幾年，足夠解決好多政治問題。而家過猶不及，政治問題解決唔到，仲引到對方要出重手全面消滅不受控現象，我一早講過，香港梗係冇事，但香港人就好大鑊。