2014年10月17日 - 信報
我師傅好耐冇出過場，佢老人家身驕肉貴，梗係唔係去咗瞓街，係我忙得滯唔得閒招呼佢老人家。一見佢，佢就話而家有啲路開封咗反而仲塞過之前，搞到佢邊到都唔想去，留喺公司打機。
佢平時咁多好計，我梗係問究竟而家咁嘅局面，有冇得拆。
佢一聽，眼尾一望，望向對住維港嘅落地大玻璃，施施然話：「計唔係冇，不過行唔通啫。」我問佢究竟係乜，佢話：「而家搞到咁大鑊，絕對出人意表，冇人事前諗到。要擺平佢，就要有更加出人意表的事情出現，咁就可以化解。」
要拆局除非有大事件發生
「硬骨頭落台？」佢話：「你都傻嘅，呢樣點算係出人意表呀，預咗喇喎。佢基本上廢晒武功，佢以前嗰啲暗渡陳倉，鬼鬼祟祟、側側膊已經唔work，除非佢殺晒香港人，否則出動圍佢呢招長期發生，佢邊做到嘢？阿爺最醒，記唔記得APEC本來有個會喺香港開？年頭話要改番喺北京開。11月頭就開會喇，你話如果而家APEC要喺香港開會，仲唔係畀個國際舞台過阿之鋒任佢哋講？以阿爺嘅智慧，佢梗知咩嘢人有用，咩嘢人嘥米飯。」
唔係硬骨頭落台，又會係乜呀大佬？
「嗱，唔好話我黑心，一係伊波拉而家殺到香港，發生傳染個案，以香港人咁識大體，即刻散場仲會掉番轉頭幫政府抗疫。到時出現香港人團結一心嘅景象，國仇家恨就放埋一邊啦。」嘩！咁咪即係要死人？好恐怖啫。
「咩你估而家咁搞落去唔使死人？你見首富咁苦口婆心出嚟講，叫學生返番屋企人身邊，就知佢收到風，唔會同你客氣。佢算係最愛香港同有骨氣㗎喇，當年得佢仲肯大大聲話撐唐唐，而家得佢一個有錢佬肯出嚟開聲，其他都唔講嘢。玩吓手伊波拉仲可能會死少啲人。」
唔係啩，你吹水咋啩，咁大鑊？「草蜢仔，你有機會見識乜嘢叫一國喇，呢幾十年香港避過咗嘅大陸生活，係時候一次過受番。」
聽到這裏，我不禁倒抽一口涼氣……
沒有留言:
發佈留言