乜都唔成惟有讀書 - 方卓如

2014年9月1日 - 信報

其實唔可以怨阿爺，要怨就怨香港人。提委會全部都係香港人，只要佢哋全部都有個人意志，真心為香港好而提名，唔係照顧個人利益，基本上邊個都有機會畀佢哋提名，唔好話泛民，長毛都得。但現實係，係人都知，阿爺咁放心由提委會盡情去揀兩三個，佢哋嘅可預測程度非常之高，佢哋揀邊個係掌握之中。阿爺畀你一人一票，畀你香港人自己提名，最後都選唔到個能人，怪邊個？

香港的年輕人現在主導香港嘅命運，絕對應該，這個地方是他們的。佢哋上兩代嘅人已經在呢個哋方攞盡晒佢哋應得嘅嘢，再喺度指指點點話唔夠就太過分。

要怪就怪香港人

最近，我聽到最大開耳界嘅說話，就係父母希望培育仔女嘅運動天分。賽車唔得就去踢波，踢波唔得就打棒球。如果乜都唔得，咁冇計，惟有讀書。無錯，同以前唔同，父母已經開竅，讀書叻將來冇乜用，反而有門運動玩得叻，更易出人頭地。第時乜都可以由機器取代，讀書叻都唔知有乜用，但運動就唔會有機器代替，你唔會睇機械人世界盃。啲父母挑通眼眉，讀書叻咪即係要養佢成世？

所以，而家年輕人喺社會運動企得咁前，啲人話佢哋父母唔擔心咩？父母眼見年輕人未來冇乜前途，讀好書唔代表有機會出人頭地。做乖乖仔都係冇啖好食，佢哋仲有乜可以再擔心？啲老人家成日話啲後生嘅唔知自己要乜嘢。而家佢哋知自己要啲乜、唔要啲乜，啲老嘢又走出嚟話佢哋咁鬼激。啲中坑就最冇用，畏首畏尾，廢晒武功。後生嘅知道自己做緊乜嘢，而家就真係改朝換代。