神之咖啡店喺墨爾本 - 方卓如

2014年9月5日 - 信報

我以前曾經寫過，雖然香港已經沒有什麼可以名列世界前茅，但其實還有一樣大家不知不覺的東西，香港係站在世界尖端，就係咖啡。香港出去鬥世界賽的冠軍同亞軍，難度同一個溫布頓差唔多。其他國家同你鬥嘅，都係國內比賽第一名，佢哋已經身經百戰先可以走出嚟，而且全部職業水準，係以咖啡為終身職業的狂熱分子；再加上咖啡係好多國家的國飲，唔同我哋鍾意飲茶，沖咖啡係好多國家嘅國技。同佢哋鬥，就等如同巴西人鬥踢波，同法國人鬥接吻，或者同大陸人鬥打尖，你要鬥贏唔係唔得，但好難，所以香港攞到世界比賽冠軍亞軍，直情係世界一流。

咖啡比賽唔單止鬥技術，仲要鬥好味，關鍵係咖啡豆。咖啡豆呢家嘢，唔係有錢贏晒，真係要有品味。

香港咖啡奪獎　世界一流

好貴嘅藍山咖啡，畀日本人買起六七成，夠貴，但其實唔好味，冇人攞出嚟比賽。貓屎咖啡，最貴，更加唔好味，如果你攞出嚟比賽，會畀人笑。所以你諗住有錢就有靚豆，實畀人搵笨。搵到靚豆，要識炒豆，仲要識點沖，杯咖啡先好飲，呢啲係品味。攞到世界冠軍亞軍，證明香港的咖啡品味係世界一流，有錢買靚豆，識得買靚豆，仲要識炒豆。

所有咖啡大國重鎮的咖啡我都飲過，香港絕對係頭三名。但係有一樣嘢輸蝕，因為租貴，經營咖啡店太吃力，冇咗做咖啡應該有嘅瀟灑。體現喺咖啡上面，就變成店面細，迫脅，唔得從容，賣嘢雜，除咗杯咖啡之外，其他出品唔夠精，純粹賺錢幫補交租。神之咖啡店在墨爾本，咖啡、食物、裝修、氣氛、員工……統統一百分。其他十二門徒，分布澳洲、挪威、日本、英國、美國、瑞典、芬蘭。

咖啡係其中一樣可以叫人放眼世界嘅生意。佢可以帶你去繁華盛世嘅國家飲咖啡，引你去落後偏遠的國家睇莊園。

你可以用咖啡接觸最地道的當地人生活，又可以用咖啡認識唔同階層嘅人打開話題。香港呢個地方唔再係畀你香港人滾來滾去慢慢玩，咖啡人有幸入咗呢行，放眼出面，大把世界。