2014年8月21日星期四

要乜有乜仲慘 - 方卓如

2014年8月21日 - 信報

如果你為咗買樣嘢左度右度,心大心細,買到之後會覺得開心,覺得係一個成就,咁就要恭喜你喇,呢個就係最高境界,你要好好keep住。你買到證明你係有能力,梗係值得恭喜。要度,證明你未係有錢到要乜有乜,心頭好對你來說,還是似有還無,咁樣你先會有最終得到的興奮。如果你要乜有乜,諗都唔使諗,任何如取如携的東西點會令你有滿足感?咁嘅情況會令你十分空虛,痛苦比得個恨字求不得仲辛苦。

唔係點解咁多明星會吸毒酗酒?點解咁多有錢人有抑鬱症?努力過,患得患失,然後終於得到嘅感覺,千金難買。

老細有樣睇

喺會議室一張枱上面,好易見到邊個係邊個。你唔需要講名,唔需要介紹,望兩眼、聽兩句,你就知道。原因係香港幾十年功力,訂立了一套會議室潛規則,毋須明文規定,大家自然識得對號入座,做番自己崗位。

老細永遠係最易認嗰個,圍埋會議室枱一大班人,我當你全部人着同一樣衫,西裝就全部西裝,便服就清一色全部便服,嗰樣就算全部都一樣,鬼佬就鬼佬,土豪就土豪,算你是同口同面同醫生,一樣都可以認得出邊個係老細。冇辦法,做得老細,可以call到成圍枱嚟同你開會,唔會係一個普通人。

無論佢赤手空拳打江山,又或者由低做起向上爬,做到老細呢個位,氣派就已經唔同。唔需要佢坐喺主席位,一眼就睇得出。其他任何人,就算着到幾靚仔,有幾名牌大學畢業,喺你公司做到幾高級,一拍埋老細隔籬,你係靠佢搵食嘅,氣質即刻打個折扣。

都有會議室枱上的老細唔似老細,通常這類係老細的代表,老虎前面嗰隻狐狸。冇得扮,狐狸一坐埋枱,收得起條狐狸尾,但氣派始終冇老虎味。

沒有留言:

發佈留言