愈懶愈成功 - 方卓如

2014年8月27日 - 信報

政改都冇乜懸念，一係要，一係唔要，唔好問真假，咁你點？

而家嗌得最大聲要普選嘅，就係當年話香港唔應該有普選嗰班人，你話詭唔詭異？而家反而要問，有咗普選究竟係好定唔好。以前冇，特首做嘢畏首畏尾，做嘢唔敢咁盡。將來有，有晒mandate，做嘢可以勢如破竹。愛國嘅特首，唔會逆國家意，國家要你做乜就做乜。咁有授權嘅聽話特首，都唔知係咪好過一個冇授權嘅怕事特首。香港人生活幾辛苦？每日都有高級IQ題，行錯路隨時返唔到轉頭，粉身碎骨。

炒家做生意　輸多贏少

炒家最忌乜嘢？最忌炒到咁上下，覺得自己咁落去唔係辦法，唔得踏實，走去做實業，學人做生意。

呢個世界有啲嘢係唔可以掉轉，例如你可以先拍拖後結婚，但好難可以結咗婚先，之後先嚟慢慢拍拖，唔敢話冇，好少囉。做開生意，走去炒樓炒股票無乜問題，炒慣股票炒開樓，突然走去做生意，成功者一隻手數得晒，其他通常輸突炒贏嗰一浸。

個性心急　不懂管人

點解？唔係炒家唔醒，佢哋醒到爆，但佢哋係醒在識睇價錢，但唔識管人。炒家一切喺晒個腦到，身邊幾個親信就係幫佢搞後勤部隊。

做生意，又要管人，又要激勵人，又要放權畀人。嘩！炒家性格乜鬼都心急過人，左手嚟右手去，邊有心機同你慢慢輔導？

「其實你呢，你有天分嘅，不過做sales可能唔係太啱你。咁啦，調去會計部啦。唔識？唔怕，我慢慢教你。」呢啲說話，點會出自炒家把口㗎？佢哋講價就叻，「3億？兩億八，做唔做？」要炒家慢慢搞營運，慘過要佢老命。所以最聰明嘅炒家，就係要係最懶嗰隻。行之有效，就唔好多心。每個人叻一瓣已經夠食過世，唔使吓吓都要證明畀人睇自己對社會有貢獻。